«Ашыйнік» на мабільнік, або Хто можа «заглушыць» ваш тэлефон?

У адным са сталічных тэатраў спектаклі пачынаюцца з незвычайнай прадмовы дырэктара. Ён настойліва просіць гледачоў выключыць мабільныя тэлефоны і папярэджвае, што ў зале працуе сістэма падаўлення тэлефонных сігналаў, якая можа нават пашкодзіць нявыключаныя тэлефоны. Мы пацікавіліся ў дырэктара, што гэта за сістэма.

Насамрэч, ніякай сістэмы ў нас няма, — прызнаўся ён, — але тэатр разглядае магчымасць набыцця блакіратара мабільнай сувязі. Мы ўжо не ведаем, як прасіць гледачоў выключаць мабільнікі. Тэлефонныя званкі перашкаджаюць і акцёрам, і самім наведвальнікам.

У гэтым мы змаглі пераканацца самі. Падчас паказу, нягледзячы на грознае папярэджанне, у бабулі, якая сядзела побач, двойчы званіў тэлефон. Першы раз жанчына рабіла выгляд, што тэлефануюць не ёй, а ў другі… проста пачала размаўляць!

Між тым вядома, што некаторыя тэатры ў Расіі ўжо выкарыстоўваюць тэлефонныя глушылкі. Да іх дапамогі звяртаюцца і некаторыя расійскія ВНУ, каб абітурыенты не маглі выкарыстоўваць мабільнікі ў якасці сродку інфармацыі.

Мы гэтую праблему вырашылі па-свойму — яшчэ на ўваходзе забіраем у абітурыентаў тэлефоны, — распавяла нам загадчыца прыёмнай камісіі Беларускага дзяржаўнага універсітэта інфарматыкі і радыёэлектронікі Галіна Смірнова. — Калі нехта не здае апарат і мы знаходзім, іспыты для яго заканчваюцца.

А вось у самым вялікім сталічным кінатэатры не супраць таго, каб мець уласную сістэму падаўлення мабільнай сувязі.

— Калі б нам яе ўстанавілі, гэта было б добра, — лічыць намеснік дырэктара кінатэатра Кастрычнік Канстанцін Хацько. — Перад кожным сеансам просім гледачоў выключыць мабільнікі, але хто нас слухае? Наша зала ўмяшчае 1340 чалавек, можаце ўявіць, што будзе, калі ў кожнага зазвоніць тэлефон…

Як можна ўстанавіць тэлефонную глушылку, калі гэта так неабходна? З такім пытаннем мы звярнуліся ў кампанію Белцім, якая ў Беларусі лічыцца адным з лідэраў у галіне бяспекі.

— Мы ўжо больш за год не займаемся блакіратарамі, бо не маем права завозіць іх у краіну без сертыфікацыі, — патлумачылі нам у аддзеле сродкаў абароны інфармацыі. — Сертыфікат выдае Дзяржаўная інспекцыя па электрасувязі, але робіць гэта на падставе рашэння Дзяржаўнай камісіі па радыёчастотах пры Савеце Бяспекі, куды трэба звяртацца па дазвол на выкарыстанне такой апаратуры.

У кампаніі зазначылі, што попыт на такія паслугі існуе. Часцей за ўсё звяртаюцца прадстаўнікі розных камерцыйных структур і кампаній. Так, некаторым кіраўнікам перашкаджае, што іх супрацоўнікі не выключаюць мабільнікі падчас пасяджэнняў і дзелавых перамоваў.

— А вось да нас ні культурныя, ні камерцыйныя арганізацыі наконт выкарыстоўвання тэлефонных блакіратараў не звярталіся, — паведаміў сакратар Дзяржаўнай камісіі па радыёчастотах Дзмітрый Корзун. — Так, мы разумеем праблему тэатра і гатовы яе разглядзець, калі паступіць адпаведны зварот. Неабходна разумець, што бескантрольнае выкарыстанне блакіратараў можа стварыць перашкоды для станцый сотавай сувязі, адмоўна адбіцца на якасці паслуг аператараў, што прывядзе да скаргаў з боку абанентаў.

Таксама Дмітрый Мікалаевіч прапануе паглядзець на праблему яшчэ з аднаго боку:

— А калі ў тэатр прыйшоў міністр па надзвычайных сітуацыях і нешта ў краіне здарылася, ці доктар, якога тэрмінова трэба выклікаць на аперацыю? Ды і Канстытуцыя не забараняе карыстацца мабільнікам у тэатры… Блакіратар — вельмі тонкае пытанне. Мне здаецца, трэба больш уздзейнічаць на культуру людзей…

Неабходна заўважыць, што ў Расіі тэлефонныя глушылкі прадаюцца без усякіх абмежаванняў. Крыху больш чым за тысячу долараў, там можна набыць блакіратар, які будзе падаўляць тэлефонныя сігналы ў радыусе сарака метраў. Трапляюць яны з суседняй краіны і да нас. Зрэдку. Праўда, незаконнае выкарыстанне такой апаратуры ў Беларусі адсочваецца Дзяржаўнай інспекцыяй па электрасувязі.

Такія выпадкі ўжо былі, — расказаў нам загадчык інспекцыі Сяргей Багданаў. — Аднойчы сталі паступаць скаргі ад абанентаў на якасць сувязі, скардзіліся і аператары — у іх былі перашкоды на базавых станцыях. Пачалі разбірацца і вось што высветлілі. Каля жылога квартала знаходзіцца турма. Яе адміністрацыя, каб перашкодзіць зняволеным карыстацца мабільнікамі, усталявала магутны блакіратар. Прыйшлося яго адключаць…

Алег ГАРУНОВІЧ, Народная газета

Редакция
Оцените автора
BYBANNER.COM